收過咁多選民嘅意見，其中一個最令我不解嘅係，有一位自稱支持泛民、一定會投我哋嘅選民，同我哋講話見到對手民建聯日日擺街站，「好勤力」，「好做嘢」，相反，就唔多覺我哋擺街站，「當民建聯做到70分，你哋起碼都要做到50分啦，唔係選民點樣揀你喎」。哈。有趣。但我估其實都好多人係咁樣諗？🤣
首先，如果你自稱係支持泛民，點解你會覺得民建聯係做到70分架呢？佢哋咁叻咁點解你唔投佢哋呢？唔該搞清楚乜嘢先至真正叫做「做到嘢」，我當然同意擺街站等啲選民見到候選人同助選團隊係重要嘅，但呢樣絕對唔係叫做「做嘢」，你選個區議員出嚟，然後佢日日企喺你屋企樓下，咁你係咪就係覺得佢「做緊嘢」？點解你唔認認真真，攞佢哋嘅文宣，睇吓佢哋做過啲乜嘢/ 想做啲乜嘢？🤔
退一萬步，其實區議員本身就係冇權冇責，天橋漏水？係路政署負責，公園設施壞咗？你係應該搵康文署。區議員係幫唔到你做呢啲嘢架，佢最多係幫你去搵政府部門，其實同你自己打1823差唔多。🙈
咁點解要有區議員呀，佢最大嘅職能就係收集市民意見。如果你覺得「建制派做到70分」，咁佢就應該喺推送中修例嘅時候，就同政府反映原來市民好反對，叫佢唔好硬推啦。結果呢？咪就係「區議會收集市民意見，18區都普遍支持修例」。🤷🏻♀️
區議會建制派嘅邪惡，並唔係見於佢做唔到啲乜嘢「政績」，正如上面所講，區議員本身就冇乜「政績」可以做到，全部都係要政府部門配合。建制派嘅邪惡係在於佢哋做政府嘅啦啦隊，政府講乜建制派就要配合，咁我點解呢張選票要選一隊我嘅意願會「被代表」嘅啦啦隊出嚟呢？
再加上，手足喺出邊打生打死，然後你轉頭票投建制派/ 唔投票，最後建制派攞咗個議席，攞咗區議會嘅資源，用返喺自己嘅政黨度，用返嚟撐警，用返嚟殘害手足，唔L係掛？🤦🏻♀️
至於如果你話，出邊風頭火勢，你仲有閑情逸致去投票？我嘅態度就係「不分割」，當香港市民唔會分割勇武向前衝嘅時候，點解就要分割去投票嘅人？所有嘅戰線冇衝突㗎喎，樣樣都要做，每個人都盡做自己可以做到嘅嘢，咁先算齊上齊落。🙏🏻
最後，我希望聽日大家早啲起身去投票。重申一次，我唔覺得贏咗區議會過半數，個運動就會贏；事實上就算區議會泛民過半，都憾動唔到政府啲乜——但點解我哋有機會贏到呢條戰線，唔去盡做呢？
PS 本來呢張相係應該早一個星期出，本來我係想正正常常咁樣講下做街站嘅感受，然後邀請多啲人出嚟做義工助選。可惜計劃趕不上變化，但係有一啲說話仍然係應該要講。
#區議會選舉2019 #區議會 #區議會選舉
Search